Pantun Sayau

Biau pengabang 2

O-ha! O-ha! O-ha!
Nama ke semetak inggar temekung?
Munyi ke masak chagak bedil kelutung.
Tebah Kemendan Tuan Menggung,
Didinga ari pun Semambu Ngandung
Kunjung-kunjung nyadi benung Tajau Bujang,
Kebung ka burung tiung lelaki.

Nama ke semetak inggar didinga?
Munyi ke masak chagak bedil temaga
Tebah bini Tuan Raja
Didinga ari Singapura
Pansa geruda kapal bekejang,
Ngadap ka leka matahari mati.

Nama ke semetak inggar bemunyi?
Munyi ke masak chagak bedil besi,
Tebah bini tuan Ipan Stephen Beti,
Didinga ari tisi langit lati,
Lanji-lanji tengkak sawang.

Ari nya baru aku ngangau ka
Ribai ke datai ari tasik besai
Linang ledung,
Betumpu alau, berimbai ruai,
Enggau Menyalin Bungai,
Tutup Temaga Lawai Bunsu Garai,
Berumah di rantau panjai
Tinggang telesai bungai engkuang.

Ngangau ka Chendung Lempung Pelingan,
Puchung begantung nengan bulan,
Bunsu Bundan, orang tau nangga
Gam gigi gumbang.

Rumbai tu beranak ka Endu Pupu Kebul Bebuli
Tu indu pemadu nama,
Dikumbai Dayang Tekang Mau Tuchi
Rega nengeri siti menua
Beranakka Lulung datai ari
Segupung Ati Tanah
Sembah di kelasah pandan bekuang.

Beranakka Kumang
Nepan di takang apung beluyah
Menyadi Saripah Aka Tuan,
Jadi enggau Sigi Beru Hari
Ninggang kunchi guntur beringgang,
Jadi enggau Sigai Beru Lemai
Ninggang telesai ujan sayang.
Nya orang ngemeran ka batu pesuk
Teman tunjuk jari lima
Ai belambuk ngampuh ka menua.
Nya menua Apai Miga
Betanduk ngena, umba ketapu
Buok galung bauh ngelagetang.

Rumbur ka Sibau rambuk bulu
Menua ampa raya tekebu,
Sebuah tukau bangkung langkau
Menua Lemandau datai ari ngelepau
Gumbang besabung.
Menua pating aur pengerindu
Lendu-lendu maguh ka
Ulu Belimbun Jawa.
Takang buluh ayu ngachuh ka ulu
Putih Menyala.
Nya menua Raja Bangka bedinding ngena
Gumbang menyadi.
Tuan Jandan bedinding hari
Sukadana Bebuli Ati.

Nya betampung enggau menua
Raja Segangga Gunggung
Penyadung Antu Tuah
Berimbai enggau Raja Segangga Ganggai
Penatai Antu Limpah,
Nya jadi enggau Kemeli Kemantan Padi
D’ambi mimpi jadi raja.
Jadi enggau Kemelat Tampuk Lensat
D’ambi kenyap tinduk lina.

Dia sida mai pengaruh,
Batu lementak bai ngabang
Ngambika tau nyelepak awak
Menua orang.
Batu duri bai ngabang
Ulih nemu di tuki ridan pengerang
Batu pabung mai ngabang
Ulih nemu di lampung tekalung pundang.

Taring uting babi ngelampai
Tanduk rusa mulai,
Gemala panggum tupai
Dibai orang tuai mansang nandai
Selit di punggai puting ilang.

Awakka gayu, awakka guru!
Awakka gerai nyamai!
Raja nguan menua!

Kami minta jalai bidik enggau lansik,
Minta betuah minta belimpah,
Minta gerai minta nyamai
Minta chelap minta embap.

Aku ngangau ka Petara Aki, Petara Ini,
Ngangau ka orang ke lama udah lelang,
Lama udah midang,
Sida ke udah parai, ke udah nadai,
Nya dikangau, ditesau,
Nya aku kumbai, aku lambai.

Nyaup aku ngupas padung, ngupas tilung,
Ngupas panggang, ngupas ruang,
Ngupas penuduk, ngupas peninduk,
Ngupas ruai, ngupas tikai.
Ngambika iya bau rengu, bau garu,
Bau empenit, bau bangkit.
Ngambika endur betunggah, endur besembah.
Ngambika tampak Tuan, tampak Sultan,
Tampak China, Tampak Belanda,
Tampak Laut, Tampak Bunut.

Tu endur besauh, endur belabuh,
Endur betanya, endur bepinta.
Ngambika kami mansang, kami nyegang,
Kami ngebung baka langit
Entuchung baka bukit.

Ruai kami baka danau
Tampak meh kami baka pulau
Gayu guru gerai nyamai semua kitai.

O-ha! O-ha! O-ha!
Nama ke semetap munyi ngitar?
Nama ke betengah munyi kapal?
Nama ke semegup munyi bedil?
Nama ke semetup munyi bandir?
Nya nyawa anak raja, nyawa anak uda,
Nyawa anak kerani, nyawa anak mensali.

Orang nya bisi piring lebat, piring sarat,
Nya meri aku ngangau, aku nesau
Nya meri aku ngakak munyi tajai
Ngakak di dan emperawan benang.

Nya meri aku ngembau munyi ruai
Ngembau di tatai panjai nyementang.
Nya meri aku nidit munyi landai
Nidit di punggai mua lubang,

Enda kami busung, enda kami lunggung,
Enda kami tulah, enda kami pimpah.
Ga dikuan aku ditanggam bentuk selung,
Ga kaki aku bediri ngembar ruit pendawan.

Pala aku dibiau selanjau ijau manuk sabung
Dada aku luak tata minyak ai juyung
Ga aku baka paku besurung gelung
Baka tubu besulur rebung
Baka penduk betampung puchuk
Baka tali betampung wi
Baka tengang tampung belembang.
Baka rutan tampung danan.

Kami ngangau ka orang lama parai
Lama udah nadai
Ngangau ka orang ke lama udah midang
Lama udah tumbang.
Tinggang batang tebelian wi.

Ngangau ka orang lama udah nadai
Kena keranjai indai imbuk kedidi
Orang ke lama udah rentap langgar urat
Dandi lelaki.
Orang lama udah suyak tinggang karak
Kepayang padi.

O-ha! O-ha! O-ha!
Kita ke dalam tanah nyenguk naka punggung
Kita ari langit nilik naka rekung
Kita ari ili mudik sebuah bangkung
Kita ari ulu undur sebuah barung.

Kita ngabang piring rendai, piring salai
Kita ngabang piring asi, piring tumpi.
Enti kita bela udah datai, udah nyeluai,
Enti kita bela udah betugung, udah betembung
Dia kita duduk di tikai wi, tikai peradani.
Tikai pandan, tikai rutan.

Nya kitai empuru makai kapu
Kita beranggap, kita nginsap
Tang kita udah makai rendai, makai salai
Ki t a n g a b a n g , k i t a mansang
Kita mai ubat serangkap genap
Mai pengaruh kambuh tubuh.

Nya baru ninggalka batu remaung
Ulih nyamah di parung tingkah tebiang
Nya baru ninggalka batu ratai ka Simpurai
Ulih nyamah di ratai buluh temiang.
Nya baru ninggalka batu pama ke lalau lamba
Ulih nyamah di keresik lansar didendang.
Nya baru ninggalka taring tengiling ka Keling
Dua meling, lapan bekumbang.

Ny a b a r u n i n g g a l k a penyelinting
Sangking di tunjuk jari butang
Nya baru ninggalka basilar
Tangkai ka di tandan bau nuking.
Nya baru ninggalka kebal tutup
Nangkup ka adup ruang belakang.

Nya baru ninggalka lansik bidik
Ka betuah enda langkang.
Nya baru ninggalka batu padi
Kebayan puli di mua tibang terentang.
Meri nuan seharitu
Baka batu lulung umbak
Meri nuan seharitu lelijang.

Baka pisang lulung tambak
Nya baru aku nepan di batu bulan
Ngambi suman nguan menua.

Nya baru aku manggai di batu chanai
Ngambi gerai selama-lama;
Nangga sintung, nangga rabung
Nangga awan, nangga bulan,

Nadai apa ku Petara!
Gayu ku Patu! Gerai ku Simpandai!

Leka Biau Pengabang

Sa, dua, tiga, empat, lima, enam, tuuuuuujuh!
Enda ku lesi laya pambu, miau ka selanjau ijau manuk kelabu beiku layu betunggang labang,
Enda ku lesi laya sulai miau ka selanjau ijau manuk tawai bedunggul silai ngerunjung manang,
Enda ku lesi ilang laya miau ka selanjau ijau manuk banda mirah mata nakang jerenang,
Enda ku lesi laya pumpung miau ka selanjau ijau manuk tuntung kubah adung empulu arang…

Laban aku tu ukai mungkal ukai nanjal,
Aku tu endang niti endang nali,
Baka ijok tampung penduk,
Baka rutan tampung danan,
Baka ira tampung lemba,
Baka wi tampung tali..
Pecah periuk tanah ganti periuk tani,
Parai orang ka tuai, ganti tubuh kami,
Pambu orang ka dulu, ganti kami ka dudi…

Aku ga nampung pantang Belang Pinggang ke belang nyembayang punggung,
Nunda adat Surong Kempat ke berarat muting jelatung,
Nunda penti Buie Nasie datai ari tisi lambur gunung,
Nunda jako Antu Abu datai ari Munggu Gulu Puchung,
Nunda kangau Bunsu Buau datai ari Rantau Pala Lempung…

Aku tu ga nampung adat niang Rekaya dana,
Ka sidi di jari tunjuk dua, disema ka kitai bansa dayak,
Dikelandik ka kitai bansa siru bebasa di mua bala pengabang…

Aku tu ga nampung adat niang Temenggung Montegerai,
Ka sidi jari tunjuk megai, disema ka kitai bansa Dayak,
Dikelandik ka bansa kitai, dulu diguna Raja Tuan Tuai,
Matak jalai ngiring orang…

Aku tu ga nampung niang Munan, ka sidi jari tunjuk kanan,
Disema ka kitai Dayak bansa Iban, dulu diguna Raja Bansa Tuan,
Keba niang Munan digelar orang Pengulu Dalam,
Kena panah ka perintah bansa Tuan,
Ngemudi ka empenan kitai Iban ngatur pemansang…

Lama kaki aku udah bediri ba perdani anchau tikai,
Miau ka selanjau ijau manuk tawai,
Tang sayau nyawa ku enda nekis nyaris ingar rengai-rengai,
Enda tetunda ka nyawa unggal kitai Edward Kecendai…
Enggi ia dini nya ulih tunda, endang teruba kitai dayak,
Tangkap karan tali dawai, tiap pagi nyelinting lemai,
Ka bemunyi rengai-rengai nusui ka kitai di rumah panjai atur pemansang..

Lama udah kaki ku bediri ba kerembai tikai anyam dua,
Miau ka selanjau ijau manuk Banda…
Tang sayau terinting puting gensera nyawa aku enda nekis
nyaris inggar kela-kela…
Enda munyi nyawa Aya kitai Thomas Teggung Laka,
Enggi ia dini nya ulih tunda, endang tiap pagi nyelinting ari,
Enda belepa tangkap karan tali wayar,
Bejako ari radio, nusui rita meri penerang…

Lama aku udah bediri mutak-utak,
Di kerembai tikai anyam belebak,
Nyingkang ka bulang kaki betanjak,
Miau kita ti kedugau duduk betapak,
Enggau selanjau ijau manuk bejalak…
Enti nyema kita ngumbai aku sumbung jegak,
Tau ga kita nyema ka aku ngagai Gelagak Tuai Lemanak,
Ka ka bejalai kayak-kayak niti penyurai rumah pandak,
Ngerah bala anembiak nurun ngabang…

Lama udah kaki ku bediri ba kerembai tikai tudung lung,
Nyingkang ka bulang kaki nanggung,
Nunga kita ti kemumuk duduk betugung,
Miau kita enggau selanjau ijau manuk tuntung…
Enti sema kita ngumbai aku jegak panggung sumbung,
Ka bejalai kanjung-kanjung niti sentali rumah chundung,
Nyandik ketepung, nebah kerumung nencang raban gendang…

Nya alai nyau bepeluhaku ditubuh pati punggung,
Miau ka selanjau ijau manuk tuntung,
Nunga kita ka kemumuk duduk betuggung,
Baruh perentang rumah chundung…
Tang ka tu, semadi aku deka nunda biau niang Rentap,
Apai Tambung seduai Linggir laki Amung,
Enti orang nya, anang main-main,
Ati endang berani mutus kepung,
Gagah di pah pati punggung,
Endang diinang Kumang seduai Lulung,
Di kemata ka Laja seduai Sanggul Labung…
Nya alai bepantap munyi ka nesap payan betong,
Betumbuk munyi ka nyuluk buah embawang kachung…
Kati ko enda baka nya,
Laban belaban enggau Sultan Tuan Linsung,
Nan ka kuta tuchung Sadduk remawang…

Lama udah kaki ku bediri ba tikai anyam tampung,
Nunga kita ka kemumuk duduk bebandung,
Miau ka selanjau ijau manuk sabung,
Iko merundu lebat balat begupung…
Tang ka tu, semadi aku deka nunda biau Aki Lang Sengalang Burung,
Aki Jugu Menaul Tuntung,
Lang burik ka perintik baruh rekung,
Lang Labang ka checinang Kubah Adung,
Enti orang nya, anang main-main,
Ati endang berani mutus kepung,
Endang gagah di pah pun punggung,
Lebuh tembawai ka begawai besai niri ka ranyai tiang sadung,
Kena ia ngelulu ka menantu entis bulu burung ketupung,
Ngena benung managa bujang…

Lama udah kaki ku bediri ba kerembai anchau tikai,
Nunga kita ka kemumuk duduk berintai,
Miau ka selanjau ijau manuk tawai…
Tang ka tu, semadi aku deka nunda biau kejakang Manang Matai,
Nya meh orang ka sidi di jari tunjuk megai,
Orang ka bisa di penyungga dabung landai,
Orang ka tau miau rangkah tupai,
Mati pagi peda lemai tak lepai-lepai begagai di tembawai madang pinang…

Naka penyuma aku nelenga ka rasa dabung lancam,
Miau ka selanjau ijau manuk Jelayan,
Tang ka tu semadi aku nunda biau kejakang Manang Jaban,
Nya orang ti sidi di jari tunjuk ngenggam,
Nya orang ka tau belian ka rangkah Jugam,
Mati pagi peda lemai begamal jam-jam,
Ngerumbak renyuan madu besarang…

Tak nyau lelak aku di keciak arung kerigai,
Miau ka selanjau ijauu manuk Tawai,
Nunga kita ka betunga duduk berimbai,
Baruh perentang penjuang rumah panjai,
Ba tekang pengabang daun gawai,
Lemai kemari nyereta petang nyerumba lemai,
Dia ku ninga sida ka nembiak tak ragak beanti-anti,
Sida ka tuai bejaku bebai-bai,
Dibai sida ngalu petutu ikan Lansi ngempas di ai riam dalam…
Gaga aku ketawa nelenga ka rasa sengki ngeli,
Di ema akuraga panggung sintung enggau lanji,
Datai din, nadai ga aku meda pekepai ikan Lansi ngempas di ai riam dalam,
kada enda kita tu deh wai aya bala menyadi,
Ka digela orang ngagai pelamba tapang Pelai,
Tumbuh kediri-diri menoa ili,
Ditepan manyi tak besendi tampung dan…

Tak nyau lelak aku di tunjuk ujung,
Miau kita enggau selanjau ijau manuk Tuntung,
Nunga kita ka betunga duduk bebandung,
Baruh perentang penyarang rumah cundung,
Lemai kemari nyereta petang penyarang rumah jebung,
Dinga aku bala nembiak tak ragak rami kekaung,
Sida ka tuai bekumbai serimbai panjung,
Dibai sida aku ngalu jeliu petutu ikan Adung,
ngempas di lepung pala kerangan…
gaga meh aku ketawa nelenga ka rasa ujung dabung,
Di bai aku lanji, ma, raga enggau sintung,
Datai din, nadai aku tepeda ka pekepai ikan Adung
ngempas di lepung pala kerangan…
Kada enda kita tu deh wai aya kaban menyadi,
Ke digela orang ngagai pelamba Tapang Betenung Kara Riung,
Tumbuh di puncak ulu bedarung,
Tikam tempalung, lempai gulung tali pasaran…

Diatu baru aku gaga sambil gagit,
Nyingkang ka bulang kaki cawit,
Miau kita enggau selanjau ijau manuk Kuncit,
Aku ga miau semang kita ari belakang mulai ka tumbit,
Ngambi ka yang tinggi kita enda kudi ngeransi mimit,
Laban aku tu ukai biau sengapa, biau pia,
Tu ga nunda biau Apai Babit Bekait, Bujang Beruang Langit,
Ancung Selung Bebelit dikumbai orang Sapit Raja Petara…

Tak nyau lelak aku di selepak tunjuk satu,
Miau ka selanjau ijau manuk Sidu,
Miau kita ti duduk di lingkuk tikai anyam seribu,
Aku ga meda belakang enggi kita aya mekang
ditinggang kelatang baju baludu,
Aku ga miau yang semang kita ke begulang enda ngetu,
Yang tinggi kita ngambi ka enda mai ati ngeransi udu,
Yang ganggam kita enda mai ati tajam baka balan besi sekeru…
Tu ukai biau sengapa, biau pia,
Aku ga nunda biau Sentuku dikumbai orang Biku Bunsu Petara…

Kinda-kinda jari kiba tunjuk antu,
Aku ka miau kita enggau selanjau ijau manuk Sidu,
Miau kita ti duduk kemumuk duduk nungu,
Medamua kita tak semuka bulu seribu,
Miau kita ke tuai di panah perintah lumur satu,
Dikena aku miau nuan nyadi Kunsilor enggau nuan Pengulu…
Meda pekaian seduai tak melan-melan cukup lagu,
Meda tancut manah cerut umba baju batik biru,
Meda pisin nyau licin manah sugu,
Jengkuan tak melan-melan tangan jam ka segenda pukul satu…
Ukai enda kita endang disadang aku ngembuan
taring belalang, tanduk engkerudu,
Nya ga endang pengaruh ka lumur satu
dikena ngulu ngiring orang..

Tak agi lelak aku di keciak kandang dada,
Tak peluh di tubuh nelusur mua,
Aku miau kita enggau selanjau ijau manuk Banda,
Nya alai nasib manuk tu manah mimit,
Nyelit di tumbit atas dada…
Nya alai, manuk tu dikena miau nuan aya Tuai Rumah,
Ka ngepung perabung rumah raya,
Meda pekaian nuan tak melan-melan cukup gaya,
Umba baju setail baru batik Malaysia,
Enti semak, tampak rita,
Enti jauh, jelai nama,
Enti malam nadai kala padam dian lampu kelita,
Ruai enda kala kerebak tikai ancau sana
Tinggang pelembang baku temaga remba-remba
salin Cina Tukang Simanggang…
Laban Jayah kita landik madah atur perintah ubah dunya,
Laban lupu nemu ngadu nemu cara,
Kati ka enda baka nya, laban pesingan kanan tunjuk dua,
Nuan endang teleba ngaduka uta ka segenda alas ngerang…

Nya alai kaki aku bediri ba kerembai tikai sapar lima,
Miau ka selanjau ijau manuk Lia,
Nya alai tadi ungkup sida ka tuai lukai buban pala,
Tang tu ungkup nuan aya, sukung bandung ari kiba,
Meda pakaian nuan melan-melan manah gaga',
Umba baju cukup lagu tuit kelia,
Enti maia berumah, dulu ga nuan niri ke kah teras cala,
Enti maia bumai, dulu ga nuan ngabas tempalai ngerembang
babas repa,
Enti malam, nadai kala padam dian lampu pala,
Kati ku enda bakanya, laban pesingan tanggan tapa kiba
nuan endang teleba nyara ka uta ka segenda pending berejang…

Naka penyuma aku nelenga ka rasa dabung dilah,
Miau ka selanjau ijau manuk Labang Kubah,
Miau kita ka kemumuk duduk bekejangah,
Ba kerembai tikai bebuah…
Nya alai tu kena aku miau kita ka gawa perintah,
Meda pekaian kita tak melan-melan udu pemanah,
Umba baju setail baru batik Kedah,
Meda rekung tancang gelung tali nektai mirah,
Ukai enda kita endangpandai di cungai tunjuk tengah,
Landik neracat ka pinsil ai dawat rejat-rejat dakwat mirah,
kati ko enda baka nya, laban kita kena padu ka perintah
nusun langkah buah pemansang…

Nyau lelak aku dikeciak jari kanan,
Miau ka selanjau ijau manuk Jelayan,
Nunga kita ti kemumuk duduk betipan,
Nasib manuk tu manah mimit nyelit di tumbit kaki kanan,
Ke digela aku Bedang Bungkuk Belakang,
Nunga bedilang baruh mudan…
Enti pagi nuan enda kala laun dani,
Nungkun ka api ungun kenarang,
Kati ko enda bakanya,
Laban gasan nuan endang ngembuan mudan danan begitang…

Nya alai, nyau lelak aku di selepak ujung jari,
Miau kita enggau selanjau ijau manuk Lelaki,
Nunga kita ka kemumuk duduk bebandi,
Ba kerembai tikai anyam bediri,
Meda pakaian kita tak melan-melan udu rami,
Meda setail baru putung tukang Cina Miri,
Meda jangkuan tanggam jam tali luji…
Nya alai, manuk tu dikena aku miau semoa bala kita ka laki,
Enti udah dibiau aku enggau selanjau ijau manuk laki tu,
pagila lusa, ka dudi ari,
Balat amat kita bebeli ka komputer enggau injin api,
Nya alai kelita nya nyau enda dipeguna,
Lampu gis nyau dibuai ambis,
Kati ko enda bakanya, laban tanda kitai udah merdeka,
Baru menira segenda lambang burung Kenyalang…

Naka penyuma aku nelenga ka rasa dabung belabu,
Miau kita enggau selanjau ijau manuk Kelabu,
Nunga kita ka kemumuk duduk gempuru,
Ba kerembai Tikai sapar rampu…
Nya alai, manuk tu kena aku miau kita ti dara enggau
semua bala kaban indu,
Meda pakaian kita tak melan-melan cukup ngaku,
Meda buk panjai kita tak lepai-lepai mulai ka dagu,
Mua tampak kita nyau radak-radak udu burak baka telu,
Umba baju kita manah lagu setail baru bedabung tisi
ngambi bungai daun kerampu…
Kada enda kita tu ke disema orang ka tuai sebaka
enggau Endu Kumang dara Satu, indai sida Liu Panggau Dulang…

Lama kaki aku udah bediri kasak-kasak,
Miau ka selanjau ijau manuk Bejalak,
Nunga kita ka kemumuk duduk betapak,
Nasib manuk tu manah mimit,
Bedungul silai tiga beserak…
Meda pakaian kita tak melan-melan nyau kecirak,
Betancut redam bebaju burak,
Nya alai, tu kena aku miau kita ti nembiak,
Diatu amat kita mit lacit aggi biak,
Tang ka pagila lusa ka dudi hari kitai enda nemu,
Nyangka kitai bisi di imbai Sempandai
datai ari Ttai Punggang Lebak,
Bisi di embing Keling seduai Pandak Segatak,
Berani di ati kandang keciak,
Di ambi orang gawa nyadi soldadu,
Nan ka pulau Menoa sarawak,
Tan berujan ka leka meriam berani betimbak,
Ninga brita deh Menteri Menua Negeri Sarawak,
Ke lalu meri kitai medul Berani Bintang Sarawak
besampak pirak betunjang bintang…

Nya alai ka tu, nyangka kita ka
Mnsang nandang, mansang ngabang,
Mansang nandai, mansang makai,
Salah kenyap jai pengangkat,
Salah tenung jai burung,
Nya alai, manuk tu meh alai ia telempai, alai ia tepanggai,
Alai ia tepantup, alai ia tetekup,
Alai ia padam, alai ia tengelam,
Awak ka semua kitai gerai ko Sempandai,
Nadai apa ko petara,
Gayu ko Sentuku…
OOooohhhaa.. OOoohhhhhaaaa..

Leka biau olih: Lemambang Norman Sandin
Disalin olih: Ucu pengulu

Leka biau miring enggau kereban miring.

Sa, Dua, Tiga, Empat, Lima, Enam, Tuuuuujoh.

Enda aku busong ilang laya,
Megai langgai manok banda,
Kena aku miau ading piring pinang saleka,
Laban aku tu nampong jako sera nyawa,
Enggi aki kitai Rekaya,
Iya endang landik ngajar kitai bebasa,
Ka semua bala pengabang.

Enda aku busong laya pambu,
Megai langgai manok kelabu,
Kena aku miau ading piring kapu,
Laban aku tu endang nitih ka ajar nampong jako,
Enggi aki kitai Rekaya Jamban Atu,
Iya landik ngajar kitai bebasa ngena jako,
Nadai kala saru bekalih tunsang.

Aku tu miau sida Dara Santih bunsu Sirih ke tumboh betumbok takang,
Dara Chelum Bunsu Tum Sedi lulun atas bedilang,
Dara Bagau Bunsu Semakau rendang dagang,
Dara Sandu Bunsu Gentu daun pisang,
Sida tu sama udah digempuru ditu datai magang.

Aku tu mega miau sida Kumang Dara Simbut,
Bunsu Pulut Jantan Jentawang,
Bunsu penganan baka bulan rerak rumpang,
Dara Letup baka tangkup bunga kejumpang,
Enggau Endu Tematu Tali Betabu,
Bunsu Telu Manok indu kepayang mekang.

Nya alai letup pan udah ga chukop,
Asi pan udah ga bisi,
Pinang udah ga chukup magang,
Samoa perengka pan udah ga sedia,
Ditiap genap nadai timpang.

Nya baru aku ngangau ka sida ke tindok nakal singit,
Bejalai ngena burit,
Nya ga Bunsu Chapak Burak,
Ba-ukir ilak kesulai tandang.
Kita nya meh ka diasa nerima bala pengabang,
Diasoh nabi samoa orang.

Ooooooooooooooha! x 1

Tak lalu ketawa balat gaga,
Ading piring pinang saleka,
Udah dibiau enggau selanjau ijau manok banda,
Gaga diasoh nabi meri basa ngagai Petara,
Ke datai ari Tuchong Sandong Gemala,
Di bukit lilit Gerija,
Alai semuka dudok sembayang.

Nya orang ngembuan batu sedan bulan pernama,
Enggau batu takang bintang tiga,
Ambi ka ubat penyangga nyawa maioh pampang saribu guna,
Ngasoh panjai umor nguan menoa.

Lalu ketawa gaga rindu,
Pamping ading piring kapu,
Udah dibiau enggau selanjau ijau manok kelabu,
Nganti Apai Migu,
Datai ari munggu madang engkajang.
Nya orang ngembuan batu pupu gigi gumbang,
Ubat landik bejako ba gulu tugong orang.

Tak ketawa tuchum Dara Chelum,
Bunsu Tum Sedi Lulun atas bedilang,
Udah dibiau enggau selanjau ijau manok sigon,
Gaga nganti penatai Liba apai Dom,
Datai ari pun kara nurun maioh betunjang.

Tak depan-depan ketawa ading piring penganan,
Udah dikebau enggau selanjau manok jelayan,
Gaga nganti penatai Ini Andan,
Datai ari bulan ke meruan tuang-tuang,
Nya orang ke ngembuan ubat jadian mali langkang.

Tak lalu ketawa gagit deh piring pulut mit,
Udah dikebau enggau selanjau ijau manok kunchit,
Nganti penatai sida Apai Sabit Bekait,
Ari punggang tisi langit.
Nya orang ngembuan batu pengait,
Dikena ngulih ka duit mata wang.

Ketawa gaga amat asi ketupat,
Laban udah kena biau enggau selanjau ijau manok kepiat,
Nganti Kumang Dayang Sambat,
Indu orang di urat dandi nentang,
Nya ga indu pandai di pechunggai tunjok empat,
Landik ngebat tukang tengkebang.

Ketawa chaie-chaie ading piring sungki,
Udah kena kebau enggau selanjau ijau manok pungka laki,
Gaga nganti penatai Keling Aji,
Datai ari tuchong engkeraji padi,
Munyi negeri maioh orang.
Nya orang ke berani ati mutus kempang.

Piring rendai pan ketawa terai-terai,
Udah dibiau enggau selanjau ijau manok tawai,
Gaga nganti Raja Selampandai,
Datai ari menoa iya di Tatai Tanah Nyadai,
Redai terabai rampai temiang.
Nya orang ke ngembuan batu nyiur nyuntai,
Enggau batu bingka lia mulai,
Nya ga ubat besai ngasoh gerai,
Tau mudah bulih utai,
Ngasoh gayu guru gerai nyamai.

Ketawa gaga ading piring penganan jala,
Udah dikebau enggau selanjau ijau manok banda,
Gaga nganti Raja Simpulang Gana,
Datai ari Letong Jalong Temaga,
Tinggang bunga nuyan meranggang,
Nya orang ti ngembuan leka sesangga tepang,
Enggau taring uting babi menoa,
Kena kitai ngintu simpuli padi paya,
Ngambi ka tak sebaka manah magang.

Lalu taong-taong munyi ketawa ading pimping piring tepong,
Udah di kebau enggau selanjau ijau manok tuntong,
Gaga nganti penatai Aki Lang Menaul Buban,
Ari engkeleman bulan mandang,
Aki Lang Menaul Tuntong,
Ari Kebong Langit Ngeruang,
Nya orang ke ngembuan batu pugu danau kampong,
Pengantong upong balang beraang,
Enggau ubat mali rampong,
Ngasoh betampong tau serang.

Panjai ai, panjai kekira,
Luas langit, luas dunya,
Pegai tegoh batu indu gemala,
Ngambi ka tampak nama,
Jelai berita dinga orang bap dunya bumi belinggang.

Gayu ko antu,
Nadai apa ko Petara,
Semua kitai bulih pengelantang.

Ooooooooha ! x 3

Sources: Berandau Heaven.

Sempama Jako Iban.

1) Anang mantah tingkah, laban iya endang tebiang. Anang muji sarang burung Kanji, taja iya tuchi kapas magang. Anang ketawa ke sarang burung Puna, taja iya ensara semina rangkang.

2)Nguji ngunjur ke utai ti nekul, Ka mutar ke utai ti mar.

3)”Kunchit di tisi langit di asu,rusa di kaki tangga enda di emparu” Reti iya : Rindu tauka kelalu deka kiruh ngereja pengawa ke enda menuku tauka nadai ngenatai ke penguntung ba menoa ti jauh ,tang pengawa ti menyana tauka utai ti endang udah ditemu nguntung ke diri empu ba endor ti semak ,enggai kiruh ngereja ia.

4) Baru ngelangkah sesingkang udah bekalau panjung neratang ka diri menang” = orang ke sumbung madah ke diri lebih ari orang bukai taja pan utai diulih iya mimit aja lebih ari orang bukai.

5) ”Manjung di pala wong” = bedau belaban tauka betanding dulu madah ke diri udah menang.

6) ”Baka tapang diwan rembia, baka lubok diwan baya” = madah ke siko-siko orang indu udah bisi orang empu tauka bini orang.

7) ”Baka remaung di rumah, baka raung di tanah” = orang ti regas tauka kering di rumah tang ngereja pengawa di tanah nadai endar pengering tauka utai ulih.

8) ”Banyak tai badak, mayuh tai nyumboh” = Bala tubuh aja mayuh leboh ngereja utai tang utai ulih enda ngipak ke pemayuh tubuh.

9) ”Bisi niki pinang, bisi niki nibong”=Besiping atur/adat ,tauka enda adil/betul magi /mutuska pengawa.(kitai endang sama nemu,batang nibong tu endang utai ti mar tauka pedis di tiki laban ia endang beduri,tang meh batang pinang tu lamus@enda beduri lalu ia pan nyamai agi di tiki.

10)Tuai Pala Upa”=disema ke kitai ngaggai siku-suku tuai@pemimpin ke kelalu lembut tauka nadai penamu serta enda patut mangku pengawa tuai.Kira ke tuai ambi ke syarat aja meh nya.

11) ”Baka pipit ti deka nelan buah embawang”= disema ke ngaggai Orang ti ngembuan juluk ati ti besai ,tajapan iya endang nemu utai nya endang enda ulih di kerja .

12)”Baka kenyulong mabok keroh, baka empalekong mabok amboh” : Ngetu, tebalengga enda lama.

13) Gerah mata undang … baka orang indu ti jinak bendar enggau besulu … tang enti kitai nyau keran deka ka iya, iya lalu beguai nyurut ka diri.

14) Angkat Engkerawai- dikena madah ke orang ti angkat sareta bebala mayuh.

15) Belakang bungkuk diasuh ngema pintu, lengan singkung diasuh ngenyan alu.

Reti: Orang ti nadai penemu nya diasuh ngereja pengawa.

16) Kijang nyungkah punggu rebah, kijang manjung punggu pumpung.
Reti: Apin kitai ngaga penyalah, apin ga orang bulih penusah, lalu enti laban kitai orang enda kena penusah.

Nadai runggang baka pededang mata keti, nadai lilih baka benih padi wi.
Reti: Atur ti enda bechiping tauka enda ngari ari sepiak-sepiak.

17) Di Rajang baka Lundu, din baka ditu.

Reti: Enti endang ngelusu di menua diri, di menua orang pan baka nya meh, merinsa ngidup ke diri.

18) BUAH UBI LAUN DIKALI, BURUK DI PUN

BUAH EMPASA LAUN DIEMPA LUNGGAR TAUN

Reti = Penemu tauka pengelandik ke dikembuan siku-siku mensia enti enda dipekunsika enggau orang bukai nadai mih guna. Penemu / pengelandik nya deka lenyau enti orang nya tadi nadai agi.

19) Baka enseluai nangkap ludah

Reti : Bedau abis orang bejako udah di reboh/ dilampat.

20) Baka Baya ditegah indu.
Reti : Pinta Ngenyit

21) Baka Kepayang ngada ka dilah
Reti : Orang semina ngeluar ka jako aja tang iya empu enda ngereja pengawa.????

22) Semalau nampong lachau, tawak nampong begau.
Reti : Berita ka bedau pasti/ terang tang udah ditampong bala maioh.

23) Nubai sungai enggau Lia, nebang tapang enggau lungga, nimba perahu enggau tapa, nanjak wong enggau penimba.
Reti : Ngereja pengawa enda enggau patut.

24) ka lelengga ikan enda ngaban, kudi ari enda hujan.
Reti : Baka lelaki ke bisi ati ka siko indu dara tang indu nya nadai kiroh tauka iboh ka lelaki nya.

25) Cit bekutu, mayau betebu
Reti : Sama reti enggau “Rara Brunei” – ngator orang tang bisi berat sepiak. (Aum juak)

26) Enda burong terbai enti rangkang enda patah,Enda raong nyemberai enti ai enda bah…..

27) Baka idung antara mata
Reti: Enda bechiping ati....

28) Baka ular matak silui – orang ke lubah bendar ngereja pengawa.

29) Baka ular ke udah nyilui – ular enti baru udah nyilui sigi agi pedis serta nadai pengering. Iya lembut lalu suah bendar ulih diempa jelu bukai dalam babas laban enda ulih ngerari ka diri. Kitai mensia enti disema ka orang baka ular baru udah nyilui reti nya pedis isi, baru gerai sakit serta nadai pengering.

30) Baka kumang ke nupi ular sawa – ular sawa ditupi kumang ari mit tang nyau besai deka makai iya. Reti nya orang ke enda nemu beterima kasih ngagi orang ke udah nulong serta ngidup ka iya,

31) Nyamai pantuk beluai ari ditelan sawa – Enti kita bisi ngereja penyalah manah agi kitai ngaku salah serta minta ampun ari kitai ditinggang hukum tauka adat.

32) Telan sawa enda terpanggai, tangkap kamba nadai endor mulai – Orang ke bisi berasai malu nerima tolong ari orang leboh iya bisi penusah laban iya ingat ka diri empu jarang serta enda kala meri tolong ngagai orang bukai.

33) Rari ke ribut tetemu ke ujan, rari ke sungkup tetemu ke pendam – nya utai ti di kenggai, nya ga utai ti datai(nyadi)

34) Baka perau nganta ke pengkalan – Sempama urang ke baru belaki bebini, maia ti baru datai di rumah entua, cukup pemanah, cukup rajin ngereja pengawa. Tang nadai lama aja

35) Menyadi perut jani, kaban perut ikan – urang ke deka bekaban lebuh maia kitai senang ajak. Enti udah maia di tuntung penusah, nadai ia ibuh agi.

36) Duruk bubut seduai ruai :ngereja pengawa beduruk enggau pangan diri enda enggau ati ti lurus/enggai ngereja ia manah( iya ke enda lurus nya,burung bubut,burung ruai lurus enggau bubut)bisi dlm bup ensera Iban.

37) Bulan begantung senduk: suntuk@ rapas belanja

38) Baka ke meda balak entua: tegenung/tegepang/tebelenga/enda tepansut ke jaku/deka ngelara serba salah(utai baka tu suah nyadi laban org. kelia ke agi besirat) taja pia kitai enda kanji baka sekeda bansa l**t