Kitai bansa sigi maioh macham main sereta adat asal ti agi dikemeran ke kitai nyentuk ke diatu. Ambi ke banding, baka biau, miring, gawai iya ti ngundan maioh macham gawai baka gawai antu, gawai kelingkang enggau utai ke bukai. Pia mega enggau main. Kitai bansa bisi main baka ramban, bepantun, nimang, renung sereta maioh agi main ke bukai.
Taja pan baka nyak, utai ke deka diperintai ke aku ditu iya nyak ngenang jaku sempama kitai iban. Jaku sempama tu sebaka meh enggau jaku silup tauka jaku ke dikena kitai ngelaung ari nyebut utai ke bendar. Nyadi di baruh tu, aku ngerintai ke sekeda jaku sempama ke bisi ditemu aku lalu sama-sama meh kitai belajar.
Munyi ko sempama, "Kelala buah ari langgu, kelala bansa ari jaku, kelala basa ari penyiru". "Bejalai kitai betungkat ke adat, tinduk kitai bepanggal ke pengingat".
1)Baka Kepayang Ngada Ke Dilah.
Reti iya, Semina bejaku aja kerah-kerah, tang enda ngereja pengawa.
2)Aum Juak.
Reti iya, Aum tu semina nguntung ke iya ke ngempu aum aja lalu nadai mai penguntung ngagai urang ke bukai.
3)Kunchit Ditisi Langit Enda Diintu, Rusa Ditisi Tangga Enda Diemparu.
Reti iya, ngiruh diri ke utai ke mit tauka nadai mai penguntung tang enda ibuh ke utai ti semak ke besai sereta mai penguntung.
4)Baka Ketup Lelabi Mati.
Reti iya,nganchin ngereja nama-nama pengawa sereta enda meleka ngapa pama bedau temu sereta bedau bulih utai ke dikingin ke ati.
5)Besai Badak.
Reti iya,tubuh aja besai tang nadai pengering ngereja pengawa.
6)Lemi Mumban.
Reti iya, dipeda aja lembut pendiau tang anang nguji ngapa deka nguji iya.
7)Baka Empa Beketan Pindah.
Reti iya,pemakai ke diempa sampai abis nadai digalau pagila lusa, lalu bansa Beketan tu madah "Baka empa Iban begawai".
8)Baka Wa Engkebalu
Reti iya,ditaga' samapai beribu ringgit, tang udah tulak ngambu menyadi,anak ipar, semina tinggal berapa ringgit udah nyak, "Wa Entebalu".
9)Baka Pitak Buai Dimata.
Reti iya, pendiau ke nadai temu tuju, nadai endur berindik agi.
10)Basah Isi.
Reti iya, selalu disema ba pengemu babi, lenying tubuh tauka ngulit pelanduk.
11)Baka Sungai Nadai Beulu.
Reti iya, enda temu penatai tauka asal.
12)Baka Lubuk Diwan Baya, Baka Tapang Diwan Rembia.
Reti iya, Indu dara tauka lelaki ke udah meruan bisi urang ngempu tauka udah nyadi tunang urang bukai.
13)Belakang Bungkuk Diasuh Ngema Pintu, Lengan Singkung Diasuh Ngenyan Alu.
Reti iya, urang ti nadai penemu ba senentang siti-siti pengawa.
14)Kijang Nyungkah Punggu Rebah, Kijang Manjung Punggu Pumpung.
Reti iya, apin kitai ngereja penyalah, apin ga urang bukai ditinggang penusah.
15)Nadai Runggang Pededang Mata Keti, Nadai Lilih Baka Benih Padi Wi.
Reti iya, atur ke nadai bechiping enda ngari ke sapa-sapa.
16)Dirajang Baka Lundu, Din Baka Ditu.
Reti iya, enti enda ngelusu di menoa diri empu, di menoa urang pan baka nyak, merinsa ngidup ke diri empu.
17)Baru Ngelangkah Sesingkang Udah Bekalau Panjung Neratang Ke Diri Menang.
Reti iya, urang ke sumbung madah ke diri lebih agi urang bukai tang utai ke ulih iya lebih mimit aja ari urang.
18)Manjung Di Pala Wong.
Reti iya, bedau belaban, udah madah ke diri menang.
19)Baka Remaung Di Rumah, Baka Raung Di Tanah.
Reti iya, urang ti regas sereta kering dirumah, tang enti ditanah utaike ipa enggau pengering iya, enda teulih keutai.
20)Banyak Tai Badak, Maioh Tai Nyumboh.
Reti iya, madah ke tubuh bala maioh lebuh ngereja pengawa tang utai ke ulih enda ngipak ke pemaioh tubuh.
Tu kengka jaku sempama kitai bansa ke bisi ulih aku. Enti nyema kita bisi jaku sempama ke bukai tau mega bekunsi ngambi ke kitai sama-sama bela belajar ngambi ke bansa kitai dikelala serata dunya, tebilang nama, tamapak rita, entuchung kitai baka bukit, ngelembung kitai baka langit. Baka ijuk tampung penduk, baka rutan tampung danan, baka wi tampung tali. Pechah periuk tanah ganti periuk tani, padam bulan ganti matahari, parai urang ke tuai ganti tubuh kami,pambu urang ke dulu ganti kami ke dudi.
Dikarang:Stanley Ak Minun tauka Aki Lang Sengalang Burung. (Stanz Studio 2011©)
